主页 > 商务应用 >【盘房来料】港股裂口未回补仍未脱险 >

【盘房来料】港股裂口未回补仍未脱险

2020-06-13 912评论
【盘房来料】港股裂口未回补仍未脱险放大图片

隔晚美股反弹,侵侵又话中国打电话畀佢哋,大家仲有计倾,只不过中国就话冇讲电话喎,只係技术层面保持联络,至于点为之技术层面,阿Man真係识条铁咩……佢哋双方话保持联络咪得啰,重点係有联络,唔代表有沟通,双方能否达成协议更成疑问,所以对于反弹原因,都係维持原判,技术上超卖咪反弹啰,唔使特别搵个理由去解释。

恒指高开35点,呢个所谓反弹都可算有心无力,开市无耐大众老母又出嚟记招,搞到个市掉头向下,最多跌71点,见过25609点半日低位。其后A股向上拉动港股回升,最多升84点,半日高位见25764点,10日线(约25894)继续影都冇。恒指中午报收25707点,升26点;国指则升25点,报收10039点。其实港股反弹係噚日午后,见倒侵侵喺社交平台发帖后反弹,由低位计都弹咗500点过外,可惜噚日裂口未回补,呢两日唔尽快回补裂口,兼企稳喺26000点之上,港股仍未脱险。

A股今日之所以表现咁勇,咪讲係乜嘢报复式反弹,纯粹因为MSCI今日收市后提升A股纳入因子,扩容效应令追蹤相关指数基金不得不扫货,过咗呢一转强制扫货,A股随时又打回原形都唔出奇。暂时港股只可以算喘定,但仍未见一个似样反弹,大方向仍呈现一浪低于一浪走势,后市暂难乐观。

讲番重磅股方面,都係个别发展,当中唔见得有重磅蓝筹股表现突出,要数最好表现嘅蓝筹係碧桂园(02007),半日升4.6%,原因係公司回购股份。而超人亦有出手增持股份,喺上星期透过基金会斥资逾4亿元,增持长实(01113)股份。不过超人增持股份未必即时对股价带嚟刺激,今年超人喺4月底跌市前,及于今年初均有增持,只不过今次增持股份数目较前两次多。不过由年初至今几次增持,超人动用资金都只係6亿咁上下,呢个数目对超人嚟讲只係散子几个,一般凡夫俗子好难下下跟住搵食。

值得留意係之前曾被沽空机构狙击嘅安踏体育(02020),今早股价再创新高,话咗真金不怕洪炉火,有业绩支持,事实胜于雄辩,绩后亦获大行唱好,股价半日升7%。安踏股价继续变风筝,街货少同埋货源尽入基金强中手係主要原因,之前沽空机构狙击未见基金大举抛货,睇嚟沽空机构喺安踏一战应滑铁卢。

其实价值从来只会迟到,而不会缺席,好似之前阿Man曾推介嘅半新股东方教育(00667),股价今日同样创上市后新高。当然于招股时建议认购,虽然上市初期表现麻麻,但坚持落去,股价又一直守住10元,事实证明呢两个几三个月坐嘅货係无白坐。而翰森製药(03692)同样係阿Man睇好嘅半新股,今日同样创上市新高,阿Man有信心此股定非池中物,话唔定有朝一日可加入蓝筹大家庭,同样值得中长线投资。

麦狄文
(徐狄怡‧证监会持牌人)